Home
ગુજરાત
શું ગુજરાત UCC લાગુ કરનાર બીજું રાજ્ય બનશે? વિધાનસભામાં બિલ રજૂ, જાણો UCC લાગુ થવાથી શું બદલાશે?

શું ગુજરાત UCC લાગુ કરનાર બીજું રાજ્ય બનશે? વિધાનસભામાં બિલ રજૂ, જાણો UCC લાગુ થવાથી શું બદલાશે?

09:54 PM March 24, 2026 Gujju News Channel

ગુજરાત સરકારે યુનિફોર્મ સિવિલ કોડ (યુસીસી) લાગુ કરનાર દેશના બીજા રાજ્ય તરીકે તેનો ઇરાદો જાહેર કર્યો છે. આ કોડ હેઠળ લગ્ન અને નાગરિક બાબતો અંગે દરેકને સમાન નિયમો લાગુ થશે.

Uniform Civil Code : ગુજરાત સરકારે ઉત્તરાખંડમાં સ્થાપિત માળખાના અનુરૂપ યુનિફોર્મ સિવિલ કોડ (યુસીસી) 2026 બિલ રજૂ કર્યું છે. આ બિલનો ઉદ્દેશ્ય લગ્ન, છૂટાછેડા, વારસો અને લિવ-ઇન સંબંધોની નોંધણી ફરજિયાત બનાવીને તમામ ધર્મોને લાગુ પડતા કાયદાઓનો એકસમાન સમૂહ ઘડવાનો છે. આ બિલ બહુપત્નીત્વ પર પ્રતિબંધ મૂકે છે અને લિવ-ઇન સંબંધોની નોંધણી ના કરાવવા બદલ દંડની જોગવાઈ કરે છે. ગુજરાત સરકારે યુનિફોર્મ સિવિલ કોડ (યુસીસી) લાગુ કરનાર દેશના બીજા રાજ્ય તરીકે તેનો ઇરાદો જાહેર કર્યો છે. આ કોડ હેઠળ લગ્ન અને નાગરિક બાબતો અંગે દરેકને સમાન નિયમો લાગુ થશે. આજે યુસીસી અંગે મહિલાઓમાં નોંધપાત્ર ઉત્સાહ જોવા મળ્યો જેમણે મુખ્યમંત્રીને અભિનંદન પાઠવ્યા હતા. ત્યાં જ ભાજપના ધારાસભ્યોએ જયશ્રી રામના નારા લગાવ્યા હતા.

► 'આદિવાસી સંસ્કૃતિને કોઈ નુકસાન નહીં પહોંચે': CM

મુખ્યમંત્રી ભૂપેન્દ્ર પટેલે 25 મિનિટનું વિધાનસભામાં પ્રવચન કર્યું, કહ્યું હતું કે 'સંસ્કૃતિ મિટાવવા માટે બિલ નથી અને આદિવાસી સંસ્કૃતિને કોઈ નુકસાન નહીં પહોંચે, મહિલાઓ અને બાળકોના ન્યાયની વાત બિલમાં આવરી લેવામાં આવી છે. તમામ પાસાઓની ચર્ચા બાદ આ બિલ લાવવામાં આવ્યું છે. મુખ્યમંત્રીએ ગૃહમાં UCC બિલ રજૂ કરતા જ સત્તાપક્ષમાંથી જયશ્રી રામના નારા લગાવવામાં આવ્યા હતા.'

► UCC તમામ ધાર્મિક માન્યતાઓના વ્યક્તિઓને સમાન રીતે લાગુ પડશે

યુસીસી ફક્ત કોઈ એક ધર્મને લાગુ નહીં પડે પરંતુ તમામ ધાર્મિક માન્યતાઓના વ્યક્તિઓને સમાન રીતે લાગુ પડશે. ગુજરાત આ કાયદાનો અમલ કરનાર દેશનું બીજું રાજ્ય બનવા માટે તૈયાર છે. નાયબ મુખ્યમંત્રી હર્ષ સંઘવીએ જણાવ્યું હતું કે રાજકીય ક્ષેત્રના તમામ ધારાસભ્યો તેમના સંબંધિત મતવિસ્તારમાં મહિલાઓના હિત અને અધિકારોને ધ્યાનમાં રાખીને યુસીસી બિલને સમર્થન આપશે.

► બિલમાં લગ્ન અને છૂટાછેડા અંગેના નિયમો

ફરજિયાત નોંધણી: દરેક નાગરિક માટે લગ્નનું રજિસ્ટ્રેશન કરાવવું ફરજિયાત રહેશે.

દંડની જોગવાઈ: જો લગ્નની નોંધણી કરવામાં નહીં આવે, તો 10,000 રૂપિયા સુધીનો દંડ થઈ શકે છે.

બહુપત્નીત્ત્વ પર કડક સજા: એકથી વધુ લગ્ન કરનાર વ્યક્તિને 4 વર્ષની જેલની સજાની જોગવાઈ છે.

છૂટાછેડાના સમાન નિયમો: દરેક ધર્મ અને સમાજ માટે છૂટાછેડાના નિયમો એકસમાન રહેશે.

કોર્ટની માન્યતા: કોર્ટની બહાર લેવાયેલા છૂટાછેડા અમાન્ય ગણાશે અને આવું કરનાર સજાને પાત્ર રહેશે.

► લિવ-ઇન રિલેશનશિપ | Live In Relationship Law In Gujarat After UCC

ફરજિયાત રજિસ્ટ્રેશન: લિવ-ઇન રિલેશનશિપમાં રહેતા યુગલોએ 3 મહિનાની અંદર તેની નોંધણી કરાવવી પડશે.

કાનૂની સુરક્ષા: આ જોગવાઈનો મુખ્ય હેતુ કાનૂની સુરક્ષા આપવાનો અને છેતરપિંડી રોકવાનો છે.

► લઘુમતી સમાજ માટે છૂટ

મુખ્યમંત્રીએ સ્પષ્ટતા કરી છે કે લઘુમતી સમાજમાં ચાલતી પિતરાઈ ભાઈ-બહેન સાથેના લગ્નની પરંપરા પર આ કાયદો લાગુ પડશે નહીં. તેમને આ બાબતમાં છૂટ આપવામાં આવી છે. સરકારી સૂત્રોના જણાવ્યા અનુસાર, આ નિર્ણયથી તે મહિલાઓને ન્યાય મળશે જેઓ વર્ષોથી લગ્ન અને નાગરિક બાબતોને લગતા કેસોમાં નિવારણની રાહ જોઈ રહી છે. પ્રસ્તાવિત કાયદાના અમલ પછી લગ્ન અને નાગરિક બાબતો અંગે સમાન નિયમો તમામ ધાર્મિક પૃષ્ઠભૂમિના નાગરિકોને લાગુ પડશે.