Home
ગુજરાત
રાજકોટ : બંગાળના 19 બાળકોને ગોંધી બાળમજુરી કરાવતા, SOGની ટીમે તમામને મુક્ત કરાવી મેડીકલ ચેેકઅપ કરાવ્યું

રાજકોટ : બંગાળના 19 બાળકોને ગોંધી બાળમજુરી કરાવતા, SOGની ટીમે તમામને મુક્ત કરાવી મેડીકલ ચેેકઅપ કરાવ્યું

10:21 AM June 06, 2025 Gujju News Channel

બાળકોને ઇમિટેશનની કામગીરી માટે લાવ્યા હોવાની શક્યતા છે બેડી ચોકડી નજીક એક મકાનમાં બાળકોને ગોંધી રાખ્યા હતા

રાજકોટ શહેર પોલીસ દ્વારા બાળ મજૂરીને લઇ કાર્યવાહી હાથ ધરવામાં આવી છે. રાજકોટ શહેર પોલીસ દ્વારા શહેરના બેડી ચોક નજીક ગોપાલ રેસીડેન્સી શેરી નંબર 1 ખાતેથી એક મકાનમાંથી 19 બાળ મજૂરોને છોડાવવા માટે કામગીરી હાથ ધરવામાં આવી છે અને બાળકોને મેડિકલ ચેકઅપ માટે લઇ જવામાં આવશે અને તેમની સાથે મારકૂટ કરવામાં આવતી હતી કે કેમ તે સહિતની તપાસ કરવામાં આવશે. ઉલ્લેખનીય છે કે બાંગ્લાદેશીના સર્ચ સમયે પોલીસને બાતમી મળી હતી અને પોલીસ સર્ચ કરતી હોવાથી ઠેકેદાર દ્વારા છેલ્લા એકાદ મહિનાથી તમામ બાળકોને અલગ જગ્યાએ ભાડે રાખી દેવામાં આવ્યા હતા અને આ બાળકો પાસે ઇમીટેશનની કામગીરી કરાવવામાં આવતી હોવાનું પ્રાથમિક તપાસમાં સામે આવ્યું છે.

►પોલીસ તપાસ શરૂ થતા બાળકોનું રહેણાંક બદલી નાખ્યું

થોડા સમય પહેલા પોલીસ દ્વારા બાંગ્લાદેશીઓ અંગે તપાસ શરૂ કરવામાં આવી હતી અને આ દરમિયાન રાજકોટ શહેર SOG પોલીસ તેમજ એન્ટી હ્યુમન ટ્રાફિક પોલીસ ટિમને સંયુક્ત બાતમી મળી હતી કે ઠેકેદાર દ્વારા પશ્ચિમ બંગાળથી બાળકોને રાજકોટમાં લાવી બાળમજૂરી કરાવવામાં આવી રહી છે. આ પછી પોલીસ તપાસ શરૂ થતા ઠેકેદાર દ્વારા બાળકોનું રહેણાંક બદલી દેવામાં આવ્યું હતું અને અન્ય જગ્યાએ રાખવામાં આવ્યા હતા. જે બાદ આજે માહિતી મળતા પોલીસ ટીમ રાજકોટના બેડી ચોક નજીક આવેલ ગોપાલ રેસીડેન્સી શેરી નંબર 1માં આવેલ બ્લોકનંબર જી-33માં પહોંચી તપાસ કરતા એક મકાનમાં 19 બાળકો મળી આવ્યા હતા. આ બાળકોમાં 2 બાળકોની ઉંમર 14 વર્ષથી પણ ઓછી હતી જયારે 5 બાળકોની ઉંમર 18 વર્ષ તેમજ એકની ઉંમર 19 વર્ષ અને 23 વર્ષ હતી જયારે 12 બાળકોની ઉંમર 14થી 17 વર્ષની હોવાનું પ્રાથમિક તપાસમાં સામે આવ્યું છે.

► બાળકો મૂળ પશ્ચિમ બંગાળના - ઈમીટેશનનુંં કામ કરતા

પોલીસે પ્રાથમિક તપાસ કરતા આ તમામ બાળકો મૂળ પશ્ચિમ બંગાળના રહેવાસી હોવાનું અને અહીંયા ઇમીટેશનનું કામ કરતા હોવાનું સામે આવ્યું છે. ઠેકેદાર તમામ બાળકોને અલગ અલગ સમયે છેલ્લા 2 વર્ષમાં રાજકોટ લાવ્યો હોવાનું પણ પોલીસની પ્રાથમિક પૂછપરછમાં સામે આવ્યું છે. આ ઉપરાંત આજે જે જગ્યાએથી બાળક મળી આવ્યા તે ગોપાલ રેસીડેન્સીના બ્લોક નંબર જી-33ના મકાન માલિકનું નામ બાબુભાઇ ગોલાભાઈ બાળા હોવાનું સામે આવ્યું છે તેમને કોઈ ભાડાકરાર કર્યો હતો કે કેમ તે દિશામાં પણ પોલીસે તપાસ શરૂ કરી છે. જો ભાડાકરાર નહિ હોય તો અલગથી જાહેરનામા ભંગ બદલ કાર્યવાહી હાથ ધરવામાં આવી શકે છે.

► ‘બાળકોના શરીર પર ઈજાના નિશાન’

પોલીસે બાળકોની તપાસ શરૂ કરી તો પોલીસને મોટાભાગના બાળકોના શરીર પર હાથ તેમજ વાસાના ભાગે ઇજાના નિશાન જોવા મળ્યા હતા. જેથી બાળકોને માર મારવામાં આવતો હોવાની પણ શંકા હોવાથી પોલીસ દ્વારા અત્યારે તમામ બાળકોનું મેડિકલ ચેકઅપ કરાવવામાં આવશે અને રિપોર્ટ આવ્યા બાદ અલગથી કાર્યવાહી હાથ ધરવામાં આવી શકે છે.