Home
ગુજરાત
ગુજરાતના 77 તાલુકામાં કમોસમી વરસાદઃ વીજળીના કડાકા અને કરાં સાથે મહુવામાં સાડા 3, લાઠીમાં અઢી ઈંચ ધોધમાર ખાબક્યો

ગુજરાતના 77 તાલુકામાં કમોસમી વરસાદઃ વીજળીના કડાકા અને કરાં સાથે મહુવામાં સાડા 3, લાઠીમાં અઢી ઈંચ ધોધમાર ખાબક્યો

09:09 PM May 06, 2025 Gujju News Channel

કમોસમી વરસાદના કારણે રસ્તાઓ પર પાણી ફરી વળ્યાં હતાં, જેના કારણે વાતાવરણમાં ઠંડક પ્રસરી ગઈ હતી. જો કે, આ કમોસમી વરસાદના કારણે ખેડૂતો ચિંતામાં મુકાયા છે

Today Gujarat Rain Data : એકસાથે 3 સિસ્ટમ સક્રિય થતાં હવામાન વિભાગ દ્વારા આગામી 8મી મે સુધી ગુજરાતમાં કમોસમી વરસાદની આગાહી કરવામાં આવી છે. જેના પગલે રવિવારે મોડી રાતથી રાજ્યના હવામાનમાં પલટો જોવા મળી રહ્યો છે. ગઈકાલે રાજ્યના અનેક ભાગોમાં ધોધમાર વરસાદ ખાબક્યા બાદ આજે સતત બીજા દિવસે પણ 77 તાલુકામાં કમોસમી વરસાદ વરસ્યો હતો.

► ભાવનગર જિલ્લાના મહુવામાં 4 ઈંચ વરસાદ

ગાંધીનગર સ્થિત સ્ટેટ ઈમરજન્સી ડેટા સેન્ટર દ્વારા જારી કરવામાં આવેલા આંકડા અનુસાર, આજે સવારે 6 થી સાંજે 6 વાગ્યા સુધીના 12 કલાક દરમિયાન સૌથી વધુ 93 મિ.મી (3.6 ઈંચ) વરસાદ ભાવનગર જિલ્લાના મહુવામાં નોંધાયો છે. આ સિવાય અમરેલી જિલ્લાના લાઠીમાં 61 મિ.મી (2.4 ઈંચ), લિલિયામાં 49 મિ.મી (1.9 ઈંચ), સાવરકુંડલામાં 38 મિ.મી (1.5 ઈંચ), અમરેલીમાં 47 મિ.મી (1.85 ઈંચ), બાબરામાં 36 મિ.મી (1.42 ઈંચ), રાજકોટના ગોંડલમાં 33 મિ.મી (1.30 ઈંચ) વરસાદ નોંધાયો છે. આમ અત્યાર સુધીમાં ગુજરાતના 7 તાલુકામાં 1 ઈંચથી વધુ અને 2 તાલુકામાં 2 ઈંચથી વધુ વરસાદ વરસ્યો છે. જો અન્ય તાલુકાની વાત કરીએ તો, કચ્છના નખત્રાણામાં 22 મિમી, ડાંગના વઘઈ અને ભાવનગરમાં જેસરમાં 21-21 મિ.મી, રાજકોટના જસદણ અને વીંછિયામાં 20-20 મિ.મી વરસાદ નોંધાયો છે.

► કમોસમી વરસાદના કારણે ખેડૂતો ચિંતામાં

ભાવનગર જિલ્લાના ગારિયાધાર, પાલીતાણા અને તળાજા પંથકમાં આજે બપોરે અચાનક વાતાવરણમાં પલટો આવ્યો હતો, જેના પગલે ધોધમાર વરસાદ વરસ્યો હતો. બપોર પછી અચાનક વાતાવરણ બદલાયું અને પવન સાથે વરસાદ તૂટી પડ્યો હતો. તળાજાના સોસિયા, મણાર, ત્રાપજ સહિતના ગ્રામ્ય બરફના કરા સાથે ધોધમાર વરસાદ થયો હતો. કમોસમી વરસાદના કારણે રસ્તાઓ પર પાણી ફરી વળ્યાં હતાં, જેના કારણે વાતાવરણમાં ઠંડક પ્રસરી ગઈ હતી. જો કે, આ કમોસમી વરસાદના કારણે ખેડૂતો ચિંતામાં મુકાયા છે, કારણ કે તેનાથી ઉભા પાકને નુકસાન થવાની ભીતિ છે.

► વરસાદથી તૈયાર પાકને નુકસાન

ખેડૂતોના જણાવ્યા અનુસાર, આ સમયગાળા દરમિયાન થયેલા અચાનક વરસાદથી તૈયાર પાકને નુકસાન થઈ શકે છે, જેના કારણે તેઓને આર્થિક નુકસાન સહન કરવું પડી શકે છે. આ પરિસ્થિતિને કારણે ખેડૂતો ચિંતિત છે અને સરકાર પાસે મદદની અપેક્ષા રાખી રહ્યા છે. ખેડૂતોનું કહેવું છે કે, આ સમયે થઈ રહેલા વરસાદથી તૈયાર પાકને નુકસાન થઈ શકે છે. જેના પરિણામે તેમને આર્થિક નુકસાન સહન કરવું પડી શકે છે. અમે સરકાર સમક્ષ સહાયની અપેક્ષા રાખીએ છીએ.