Home
ગુજરાત
હવામાન વિભાગની આગાહી : જાણો ગુજરાતમાં ક્યારે ચોમાસુ થશે સક્રીય ?

હવામાન વિભાગની આગાહી : જાણો ગુજરાતમાં ક્યારે ચોમાસુ થશે સક્રીય ?

10:02 PM June 10, 2025 Gujju News Channel

હવામાન વિભાગે આગાહી કરી છે કે, દક્ષિણ ગુજરાત અને દક્ષિણ સૌરાષ્ટ્રમાં વરસાદની શક્યતા રહેશે જ્યાં હળવાથી મધ્યમ વરસાદ પડી શકે છે

Monsoon in Gujarat : ગુજરાતમાં ચોમાસાને લઈને મહત્વની આગાહી સામે આવી છે. હવામાન વિભાગે આગાહી કરી છે કે, આગામી 5 દિવસ બાદ રાજ્યમાં ચોમાસુ સક્રિય થશે. આગામી 3 દિવસ ભેજના કારણે વરસાદની સંભાવના રહેશે.

► 5 દિવસ બાદ ચોમાસુ સક્રિય થવાની સંભાવના

હવામાન વિભાગે આગાહી કરી છે કે, દક્ષિણ ગુજરાત અને દક્ષિણ સૌરાષ્ટ્રમાં વરસાદની શક્યતા રહેશે જ્યાં હળવાથી મધ્યમ વરસાદ પડી શકે છે. તાપમાનમાં ઘટાવાની શક્યતા નહિવત રહેશે તેમજ 15 જૂન બાદ ચોમાસુ સક્રિય થવાની સંભાવના પણ વ્યક્ત કરી છે.

► આ જિલ્લાઓમાં વરસાદની આગાહી

હવામાન વિભાગના જણાવ્યા અનુસાર, 12 જૂન સુધીમાં રાજ્યના દરિયાકાંઠાના વિસ્તારોમાં વરસાદી વાતાવરણ રહી શકે છે. આ સાથે, થોડા દિવસોમાં ચોમાસુ પણ આવી શકે છે. અમરેલી, ભાવનગર, સોમનાથ, તાપી, વલસાડ, નવસારી, દમણ અને દાદરા નગર હવેલીમાં 10, 11 અને 12 જૂન દરમિયાન હળવો વરસાદ પડી શકે છે.

► 13 અને 14 જૂને આ સ્થળોએ વરસાદની આગાહી

13મી જૂને ગીર સોમનાથ, અમરેલી, ભાવનગર, દાહોદ, પંચમહાલ, છોટા ઉદેપુર, વડોદરા, ભરૂચ, નર્મદા, સુરત, તાપી, ડાંગ, નવસારી અને વલસાડ જિલ્લામાં હળવા વરસાદની સંભાવના છે. 14મી જૂને રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, અરવલ્લી, મહિસાગર, દાહોદ, પંચમહાલ, છોટા ઉદેપુર, વડોદરા, ભરૂચ, નર્મદા, સુરત જિલ્લામાં છૂટાછવાયા સ્થળોએ હળવો વરસાદ પડી શકે છે.